Umframframleiðsla - Tómas Ævar Ólafsson
Umframframleiðsla - Tómas Ævar Ólafsson

Umframframleiðsla - Tómas Ævar Ólafsson

Regular price 3.499 kr 0 kr


  • Kilja 
  • 76 bls
  • 12,9 X 19,8 cm
  • ISBN: 9789935955388
Umframframleiðsla er ljóðræn rannsókn á þeim verkfærum sem nútímasamfélag beitir á innstu kjarna manneskjunnar. Ljóðabálkurinn fylgir leit ljóðmælanda að lausn undan óefni í sálarlífi sínu. Hann ber vandamál sitt á borð þriggja kvenna; trúnaðarvinkonu, sálfræðings og ókunnugrar manneskju á öldurhúsi. Verkið skoðar hlustun og viðbrögð þeirra við óefninu. Sálfræðingurinn hlustar með ákveðinni ætlun eftir vandamálunum til þess eins að snúa á þau. Á öldurhúsinu á sér stað óvirk hlustun þar sem ljóðmælandi og kunningi bíða aðeins eftir því að fá orðið og tala á víxl um raunir sínar. Trúnaðarvinkonan sem er uppfull af internetfróðleik, hlustar hins vegar virkt og veitir hlýju en gefur fjarstæð flökkusöguráð. Inn í frásögnina fléttast ýmsar samgönguleiðir og tilraunir til að orða það sem ekki fæst orðað.

Tómas Ævar Ólafsson er frá Akranesi en býr í Vesturbæ Reykjavíkur. Hann lauk MA-prófi í heimspeki frá Háskóla Íslands og leggur nú loka hönd á MA-próf í ritlist við sama skóla. Hann hefur vakið athygli fyrir dagskrárgerð á Rás 1, auk þess sem skrif hans hafa birst í bókmenntatímaritum, safnbókum og aftan á vínylplötum. Umframframleiðsla er hans fyrsta ljóðabók.

 

þú dregur fram óefnið
hún vegur það í hendi sér


það er léttara en hún bjóst við


kvíðinn er neysluvara
eins og allt annað
segir hún
kámugur og klístraður
brýtur hann sér leið inn í kjarnann
eins og veira


undan honum streyma áhyggjur
á færibandi


flakaðar og fullverkaðar


en það ert þú
segir hún
sem ræsir vélina


einn lítill neisti
getur vakið heila verksmiðju

rifrildi í næsta herbergi

opin vínflaska á stofuborði

ósvarað símtal