Okfruman - Brynja Hjálmsdóttir
- Kilja
- 80 bls
- 12,9 X 19,8 cm
- ISBN: 9789935946812
Okfruman er ljóðsaga um uppvöxt, áföll og andlega upplausn. Við fylgjum sköpun manneskju frá fyrsta frumusamruna fram á fullorðinsár og tilraunum hennar til að fóta sig í lífinu. Í ljóðunum eru dregnar upp óvenjulegar og nær martraðarkenndar myndir sem einkennast af frjórri hugsun, leikgleði og vísunum í þjóðsögur, hryllingsmyndir og allt þar á milli. Þetta er frumraun sem íslenskir ljóðaunnendur hafa beðið eftir.
Brynja Hjálmsdóttir er bóksali og skáld úr Reykjavík. Áður hafa skrif hennar birst í bókmenntatímaritum og safnbókum. Okfruman er hennar fyrsta ljóðabók. Bókina prýða teikningar eftir höfundinn.
Í rigningunni er malbikið
glitrandi hreistur
Þess vegna veitir því enginn athygli
þegar gríðarstór svört slanga
skríður upp úr hafinu
og hringar sig utan um flugvöllinn í Skerjafirði
Enginn sér hana
nema barnið
Grunlausir bílar
keyra viðstöðulaust inn í eitrað ginið
um nætur
óskar slangan þess
að hún væri stúlka með fætur
í gulum stígvélum
sem horfir á flugvélarnar sofa
hnýtir fingurna fasta
í víragirðinguna
hefur sig á loft